Lidhja Demokratike e Kosovës ka reaguar përmes një komunikate për media, duke mohuar kategorikisht çdo marrëveshje me Partinë Demokratike të Kosovës apo ndonjë subjekt tjetër politik për bashkëqeverisje në Prishtinë.
Sipas njoftimit, LDK thekson se nuk ka qenë pjesë e asnjë procesi ndërpartiak që do të çonte në një marrëveshje të tillë, duke shtuar se strukturat dhe organet vendimmarrëse të partisë nuk kanë diskutuar apo miratuar ndonjë bashkëpunim të kësaj natyre.
Në komunikatë bëhet e ditur se çdo pretendim për marrëveshje të mundshme nuk përfaqëson qëndrimin zyrtar të LDK-së dhe nuk krijon asnjë obligim politik për këtë subjekt.
Po ashtu, theksohet se marrëveshjet ndërpartiake mund të realizohen vetëm përmes strukturave zyrtare, transparencës dhe vendimmarrjes institucionale.
LDK njofton se për çështjet lokale do të angazhohet pas zgjedhjeve nacionale, ndërsa aktualisht fokusi kryesor mbetet procesi i ringritjes së partisë dhe angazhimi i plotë i anëtarësisë në këtë drejtim./teve1.info/
