Lidhja Demokratike e Kosovës ka akuzuar Lëvizjen Vetëvendosje për mashtrim politik dhe tentim të marrjes së meritave, vendimin e asamblesë së Prishtinës për bartjen e të hyrave vetanake të vitit 2024 në vitin 2025.
Sipas LDK-së, LVV ishte partia që e ka bllokuar këtë proces.
“Lidhja Demokratike e Kosovës denoncon prerazi fushatën e radhës së mashtrimit politik nga Lëvizja Vetëvendosje, e cila sot po përpiqet t’i shpëtojë përgjegjësisë duke trilluar merita për një proces që vetë e ka bllokuar tri herë radhazi. Dokumentet flasin qartë: më 21.05.2025, 12.06.2025 dhe 27.06.2025, bartja e të hyrave vetanake ka dështuar sepse asambleistët e Vetëvendosjes votuan kundër, duke paralizuar pagesat për shërbimet esenciale dhe duke dëmtuar funksionimin e kryeqytetit. Tani, pas muajsh bllokadash të qëllimshme, Vetëvendosja del e pretendon se paska “zhbllokuar” vetveten. Ky është modeli i tyre politik: krijo krizë, godit qytetin, pastaj dil në podium e shpall veten hero. Një paturpësi e pastër politike”, thuhet në komunikatën e LDK-së.
Kuvendi Komunal i Prishtinës të enjten në një seancë të jashtëzakonshme ka votuar për bartjen e mjeteve vetanake nga viti 2024 në vitin 2025 që kapin vlerën e 28 milionë eurove. Për votuan 38 asamblistë e një abstenoi. Në mesin e atyre që votuan ishin edhe asambleistët e Vetëvendosjes.
Pas këtij vendimi, ministri në detyrë i Financave, Hekuran Murati tha se Vetëvendosje bëri në Prishtinë, atë që LDK nuk e bëri në Kuvendin e Kosovës, duke ju referuar seancës ku dështoi miratimi i buxhetit për vitin 2026 si dhe disa marrëveshje ndërkombëtare.
