Lidhja Demokratike e Kosovës ka vlerësuar se vendimi i Qeverisë në detyrë për ta dërguar Besnik Bislimin në Bruksel, në kuadër të dialogut me Serbinë është i pajustifikueshëm.
LDK ka thënë se zgjedhjet e 9 shkurtit kanë dhënë një mesazh të qartë për qytetarët e vendit, duke theksuar se ky vullnet politik nuk i jep mandat Bislimit të përfaqësojë Kosovën në dialogun mes Kosovës dhe Serbisë.
“Zgjedhjet e 9 shkurtit dhanë një mesazh të qartë nga qytetarët e Republikës së Kosovës. Ky vullnet politik nuk i jep mandat z. Bislimit të përfaqësojë Kosovën në një proces kaq të rëndësishëm dhe vendimtar. Përfaqësimi në dialog mund të bazohet vetëm mbi institucione legjitime të dala nga zgjedhjet dhe të mbështetura nga sovrani”, ka shkruar LDK-ja.
Derisa, kjo parti shtoi se ky proces nuk mund të reduktohet në vendimet e njëanshme të qeverisë në detyrë.
“Dialogu me Serbinë është proces i ndjeshëm që përcakton të ardhmen e shtetit tonë. Ky proces nuk mund të reduktohet në vendime të njëanshme të një qeverie në detyrë, e cila nuk gëzon më besimin qytetar dhe as shumicën e nevojshme për të marrë përgjegjësi të këtij niveli. Veprime të tilla dëmtojnë kredibilitetin ndërkombëtar të Kosovës dhe rrezikojnë ta cenojnë rrugën tonë euroatlantike”, ka shtuar LDK-ja.
Në fund, LDK-ja ka theksuar se do të mbron me vendosmëri këtë parim, duke theksuar se dialogu nuk mund të udhëhiqet nga improvizime partiake të një qeverie pa mandat.
“Kosova ka nevojë për përfaqësim të denjë, të fuqishëm dhe mbi të gjitha legjitim. Lidhja Demokratike e Kosovës do të mbrojë me vendosmëri këtë parim, duke theksuar se dialogu nuk mund të udhëhiqet nga improvizime partiake të një qeverie pa mandate”, ka theksuar në fund LDK-ja./teve1.info/
