Lidhja Demokratike e Kosovës, ka kujtuar 24-vjetorin e masakrës së Mejës, në të cilën forcat serbe kanë vrarë 376 burra dhe civilë të pafajshëm.
LDK ka thënë se sakrifica e madhe e burrave, grave, pleqve dhe fëmijëve që ranë për të mos vdekur kurrë, mbesin rikujtim i vuajtjeve të popullit për lirinë e sotme.
“Operacioni famëkeq i përgatitur e menduar mirë nga forcat fashiste serbe për të bllokuar korridoret e më shumë se 15 fshatrave dhe për të grumbulluar sa më shumë burra që ishin të moshave 15 deri në 60 vjeç, kishte qëllimin e qartë, ekzekutimin e tyre në prani të familjarëve”, ka shkruar kjo parti në një postim në Facebook.
Këtë krim LDK e ka quajtur makabër, duke thënë se të gjitha ato jetë të marra, ato krisma pushke që po shuanin familje të tëra në pranverë të vitit 1999 kishin ndodhur në “Lëndinën e Pikëllimit”, ku prehen të qetë eshtrat e të rënëve, por që sot vazhdojnë të mbesin të zhdukur edhe shumë prej tyre.
“Sakrifica e madhe e burrave, grave, pleqve e fëmijëve që ranë për të mos vdekur kurrë, mbesin rikujtim i vuajtjeve të popullit tonë për lirinë e sotme. Nga “Lëndina e Pikëllimit” e gjithandej Kosovës ne nderojmë sakrificën e të rënëve të cilët dhanë gjithçka, dhe jetën e tyre për çlirim e pavarësi”.
Sot, shënohet përvjetori i 24-të i masakrës në Mejë të Gjakovës, ku më 27 prill 1999 u vranë 376 persona. /teve1.info/
