Janina Ymeri nga LDK-ja, ka ngritur kritika të ashpra ndaj menaxhimit të situatës energjetike në vend, duke akuzuar institucionet përgjegjëse për mungesë planifikimi dhe transparence.
Sipas Ymerit, kriza aktuale energjetike është pasojë e improvizimeve dhe reagimeve të vonshme nga ana e institucioneve.
“KEDS edhe KESCO na kanë tregua që importet po bëhen pa planifikim, ‘po na duhen çmime shumë të larta që me marrë importin dhe shpenzimet transmetuese janë të mëdha. KESCO reagoi i parë, mandej KEK ka shku tu e mbulu me propagandë jo po ka, jo s’ka prodhim të energjisë elektrike. Por, prej mbrëmë ka tregu KESCO që nuk po mbulohet ngarkesa, faktikisht ne kemi marrë import se s’ka pas mungesë të energjisë elektrike, që në disa zona ka pas. Gjysma e ngarkesës është bërë import”, tha ajo në emisionin “Info Nata” në Tëvë1.
Ajo kritikoi edhe ministren në detyrë të Ekonomisë, Artane Rizvanolli, për qasjen ndaj situatës, duke e akuzuar për mungesë përgjegjësie institucionale dhe për minimizim të krizës.
“Rizvanolli mundet mos me pa si kolaps energjetik, se në fund po e paguajmë ne. Unë s’di që ajo ka paguar diçka me përgjegjësinë e saj që e ka pas. Ne kemi paguar gjithmonë vetë. Edhe këtë import si sot, nesër e çdo ditë kemi me pagua ne. Ne perspektivën e saj nuk është kolaps, por në të dhënat teknike është. Nëse s’është kolaps, çfarë është tjetër?!. Unë e kuptoj Rizvanollin, pasi që nuk ka përgjegjësi institucionale, as Prokuroria nuk ka reagua, kështu që për të është gjithçka në rregull”, tha Ymeri. /teve1.info/
