Në një konferencë për media, profesoresha Jehona Lushaku theksoi se ky vendim përveç se ka qenë jokushtetues, sipa saj është përdorur edhe për qëllime elektorale nga Qeveria, shkruan teve1.info
“Ky vendim vërteton se MASHTI ka shkelur Kushtetutën e Kosovës duke tejkaluar kompetencat e saj dhe cenuar përgjegjësitë komunale, përkatësisht ka ndërhyrë në kompetencat vetanake të Komunës së Kamenicës për ofrimin e arsimit publik parashkollor, fillor dhe të mesëm. Ky vendim, përveç se është jokushtetues tregon se si Qeveria aktuale e ka përdorur arsimin për fitime elektorale. Kujtojmë se ky vendim ishte marrë pikërisht në kohë fushate të zgjedhjeve të kaluara lokale. Shqetësuese është poashtu dhe posaçërisht mënyra se si kjo qeveri nuk i respekton vendimet e Gjykatës Kushtetuese”, tha Lushaku.
Ajo tha se ministrja Nagavci nuk është shembull i mirë për të udhëhequr arsimin.
“Dje, ministrja e Arsimit ka deklaruar se do ta analizojë vendimin duke mos e marrë atë si të plotëfuqishëm dhe duke mos dhënë dorëheqje. Qeveria tanimë është shndërruar në një Gjykatë. Ministrja ka harruar se Gjykata Kushtetuese është ajo që analizon vendimet e Qeverisë, e jo Qeveria ato të Gjykatës Kushtetuese. Kjo ministre nuk mund të udhqëheq arsimin ku edukohen gjeneratat e ardhshme, ajo nuk është shembull i mirë. Arsimi duhet të udhëhiqet nga njerëz me kredibilitet dhe që mbajnë përgjegjësi, posaçësisht kur bëhet fjalë për shkelje të aktit më të lartë juridik dhe politik të vendit”, deklaroi Lushaku.
Tutje, ajo tregoi edhe dy arsye se pse ministrja Nagavci duhet të japë dorëheqje nga posti që ka.
“Andaj LDK kërkon dorëheqjen e menjëhershme të ministres Nagavci. Një, për të ndaluar krijimin e precedentëve dhe të mosrespektimit të vendimeve të Gjykatës Kushtetuese nga institucionet e vendit dhe dy për të ndaluar ndërhyrjen e pushtetit qendror në qeverisjen lokale”, theksoi Lushaku. /Teve1.info/
