Kryeministri, Albin Kurti pritet që të zhvillojë një takim edhe me kreun e Aleancës për Ardhmërinë e Kosovës, Ramush Haradinaj për të diskutuar lidhur me Vetingun. Mirëpo Lidhja Demokratike e Kosovës e ka refuzuar një takim të tillë.
Zëdhënësja e LDK-së, Sibel Halimi në një përgjigje për Teve1.info ka thënë se duke njohur rëndësinë e procesit të Vetingut, kontributi i Lidhjes Demokratike të Kosovës do të ofrohet në Kuvend.
Sipas saj, festa e Kurtit për t’u takuar në hapësira të tjera për një çështje kaq të rëndësishme, është e panevojshme.
“Lidhja Demokratike e Kosovës, duke njohur rëndësinë e procesit të vettingut në sistemin e drejtësisë si dhe duke u bazuar në Opinionin e Komisionit të Venecias, vlerëson se kontributi ynë do të ofrohet në institucionin më të lartë në vend, Kuvendin e Kosovës. Andaj, ftesa e kryeministrit Kurti, për t`u takuar në hapësira tjera për një çështje kaq të rëndësishme është e panevojshme”, tha Halimi.
Kryetari i Partisë Demokratike të Kosovës, Memli Krasniqi pas takimit me kryeministrin Albin Kurti ka mbajtur një konferencë, ku ka thënë se sot e ka ftuar Kurtin në Kuvendin e Kosovës, si institucioni më i lartë shtetëror ku duhet të diskutohen dhe miratohen çështjet me interes vital për qytetarët dhe të ardhmen e vendit.
“Partia Demokratike e Kosovës ka vite që ka propozuar dhe elaboruar nevojën për fillimin e një procesi të Vetingut në Sistemin e Drejtësisë të Republikës së Kosovës. Një proces i tillë duhet të implementohet në përputhje të plotë me Kushtetutën e Kosovës dhe rekomandimet e veçanta të Komisionit të Venecias. Meqenëse edhe Komisioni i Venecias në Opinionin e tij ka kërkuar arritjen e konsensusit institucional e politik, transparencë dhe standarde të larta profesionale, PDK vlerëson se zgjidhja e vetme e drejtë, e duhur dhe e qëndrueshme, është zhvillimi i këtij procesi nga ana e Kuvendit të Republikës së Kosovës, në përgjegjësinë kushtetuese të të cilit, në instancë të fundit, mbetet edhe miratimi ose jo i ndryshimeve kushtetuese të nevojshme”, ka thënë Krasniqi. /teve1.info/
