Lidhja Demokratike e Kosovës ka refuzuar ftesën e kryeministrit Albin Kurti për të biseduar për procesin e vetingut.
Sipas komunikatës së Qeverisë thuhet se kjo parti, ka thënë se kontributin do ta jap në Kuvendin e Kosovës, ndërsa që Aleanca për Ardhmërinë e Kosovës i është përgjigjur pozitivisht ftesës për takim nga kryeministri Kurti.
Të mërkurën Kurti ka zhvilluar takim me kreun e PDK-së, Memli Krasniqi, për të biseduar për këtë çështje.
“Me qëllim të njoftimit të mëtejmë lidhur me këtë proces, koordinimit të përbashkët dhe përfshirjes së gjithë akterëve, Kryeministri Kurti u ka bërë ftesë krerëve të partive parlamentare të opozitës: Partisë Demokratike të Kosovës, Lidhjes Demokratike të Kosovës dhe Aleancës për Ardhmërinë e Kosovës. Aleanca për Ardhmërinë e Kosovës ka konfirmuar takimin me Kryeministrin Kurti, ndërsa nga Lidhja Demokratike e Kosovës kanë deklaruar se do të japin kontributin e tyre në Kuvendin e Kosovës”, thuhet në komunikatën e Qeverisë
Qeveria e Republikës së Kosovës ka miratuar Koncept Dokumentin për zhvillimin e procesit të Vetingut në Sistemin e Drejtësisë, si dhe ka përgatitur draftin e amendamenteve kushtetuese dhe projektligjin për vetingun në sistemin e drejtësisë. Duke pasur parasysh rëndësinë e këtij procesi, respektimin e standardeve evropiane, si dhe të drejtat e njeriut, Ministria e Drejtësisë, kishte dërguar kërkesë në Komisionin e Venecias, me qëllim të dhënies së opinionit për Koncept Dokumentin për vetingun në sistemin e drejtësisë dhe draftin e amendamenteve kushtetuese.
Më datë 17 qershor 2022, Komisioni i Venecias ka miratuar Opinionin për vetingun./teve1.info/
