Lidhja Demokratike e Kosovës sot (12 qershor) është duke prezantuar një plan 15 pikësh për një qeveri gjithëpërfshirëse.
Kryetari i LDK-së, Lumir Abdixhiku ka thënë se Kosova është në krizë politike për çka sipas tij duhet të bëhet një zgjidhje sa më shpejt.
“Duhet ta pranojmë se jemi në krizë politike e institucionale dhe në një kohë urgjencë”, ka deklaruar ai në konferencën e LDK-së.
Ndryshe, Abdixhiku kishte thënë se ky plan është përmbajtja e vetme për dalje nga ngërçi i krijuar.
Sipas tij, ky është “një dokument që jep drejtim, kthjelltësi dhe qëllim vet unitetit; deri në zgjedhje të reja parlamentare”.
“E propozova sepse shteti është bllokuar. Sepse nuk ka Kuvend funksional. Sepse nuk ka Qeveri funksionale. Sepse nuk ka përfaqësim legjitim. Sepse, mbi të gjitha, nuk ka asgjë tjetër të sinqertë që po ndodhë në prapaskenë, që na dërgon drejt një përafrimi e një zgjidhje – çfarëdo qoftë ajo”, kishte shkruar Abdixhiku.
