Koalicioni mes Lëvizjes Vetëvendosje dhe Partisë Demokratike të Kosovës në Komunën e Gjilanit është prishur, ku kryesimin e Kuvendit Komunal e ka marrë Lidhja Demokratike e Kosovës.
Këtë e ka bërë të ditur vetë partia fituese, ku ka thënë se prishja e koalicionit i dha mundësinë atyre që të bëhen shumicë me ç’rast edhe ta marrin kryesimin e Kuvendit Komunal. LDK ka njoftuar se Kushtrim Kadriu është zgjedhur kryesues i ri i Kuvendit Komunal.
Lidhur me këtë ka reaguar kryetari i Gjilanit, Alban Hyseni, duke thënë se partitë në fjalë për interesa të përbashkëta e për punë të ndyta mund të bëhen bashkë.
Hyseni thotë se kasta e vjetër kleptokraste e zhvatëse zgjodhën për kryesues një asamblist që ka një grusht votash.
Përmes një statusi në Facebook, i pari i Komunës së Gjilanit ka thënë se Kadriu është dënuar para pak kohesh nga Gjykata.
“Është tejet zhgënjyese të shohësh, të veprosh e jetosh me nivelin e politikës së vendit tonë. Por, prapëseprapë, kjo ngjarje e shumë të tjera, për ne, që jetojmë për ndryshim, që frymojmë ndryshe, që punojmë ndryshe duhet të jetë dhe është motiv shtesë për të vazhduar rrugën drejt synimeve tona”, ka shkruar Hyseni.
Ndërkohë, LDK përmes një postimi në Facebook ka shkruar se raporti u ndërruar për arsye që Hyseni që dy vite i ka ndërprerë bashkëpunimin me PDK-në.
“Ky raport u ndërrua për shkak se i pari i ekzekutivit z. Hyseni deklaroi publikisht se e ka ndërprerë bashkëpunimin e PDK-në, i cili zgjati gati dy vjet. I kishte partnerë, bashkëpunëtorë dhe e ndanë pushtetin për këtë kohë bashkë. Po ashtu, lidershipi i PDK-së njoftoi se e ka ndërprerë partneritetin për shkak të mos mbajtjes së fjalës, mos bashkëpunimit dhe partneritetit nga ana e të parit të ekzekutivit z. Hyseni, i cili e përfaqëson Vetëvendosjen”, thuhet në njoftim./teve1.info/
