Lidhja Demokratike e Kosovës (LDK) e konsideron të paprecedent faktin që ministrja e Arsimit, Arbërie Nagavci, ka njoftuar “10 ditë para fillimit të vitit shkollor, se ende nuk janë siguruar tekstet shkollore”. Me këtë rast, ka kërkuar dorëheqjen e saj.
Në një konferencë për media, kryetarja e forumit të gruas të Lidhjes Demokratike të Kosovës, Jehona Lushaku – Sadriu tha se kjo po ndodh për herë të parë në historinë e Kosovës, përcjell teve1.info
Po ashtu ajo theksoi se e tërë kjo situatë dëshmon “papërgjegjësinë e Qeverisë”.
“Kjo ndodh për herë të parë në historinë e Kosovës dhe fëmijët mbesin pa tekste. E dorëzuar tërësisht ministrja përpara një paaftësie për të siguruar librat, Qeveria e Kosovës ka vendosur që t’ua bart përgjegjësinë prindërve për blerjen e teksteve dhe familjeve të tyre, duke ndryshuar metodën e furnizimit me tekstet edhe duke krijuar konfuzitet total te prindërit dhe te shkollat. ..e gjithë kjo situatë dëshmon papëgjegjësinë e kësaj Qeverie për të planifikuar saktë buxhetin dhe menaxhuar procesin e sigurimit të teksteve shkollore me kohë dhe të cilat janë obligim ligjor i Ministrisë”, deklaroi ajo.
Teksa kërkoi dorëheqjen e Nagavcit, Lushaku-Sadriu potencoi se “një ministre e tillë është e dë,shme për Kosovën”.
“Kërkojmë dorëheqjen të menjëhershme të ministres Nagavci, për shkak të keqmenaxhimit, shkeljeve sistematike të ligjeve në fuqi, e fillimisht Kushtetutës, dhe të anarkisë të krijuar në sistemin e arsimit. Kosova nuk meriton një ministre që ka dështuar çdo nivel të menaxhojë me arsim, po përfundimisht është dorëzuar duke ia bartur përgjegjësinë prindërve. Një ministre dhe një Qeveri e tillë është e dëmshme për Kosovën, prandaj ikja e saj do duhej të bëhej menjëherë”, shtoi Lushaku – Sadriu.
Ministrja e Arsimit, Arbërie Nagavci, dje ka bërë të ditur se janë duke shqyrtuar mundësinë për transferimin e mjeteve për sigurimin e teksteve shkollore te prindërit, pasi “çmimet e ofruara nga shtëpitë botuese janë të papërballueshme për buxhetin e MASHTI-t”.
Teksa nuk e ka përjashtuar edhe mundësinë e vendosjes së çmimeve tavan. /Teve1.info/