Lidhja Demokratike e Kosovës, ka vlerësuar aktgjykimi i Gjykatës Kushtetues se grupi më i madh parlamentar nuk mund ta bllokojë konstituimin e Kuvendit dhe se duhet të sigurojë shumicën ose të arrijë konsensues.
Sipas LDK-së ky aktgjykim nuk lejon ndërrimin e mënyrës së votimit dhe duhet respektuar rregullat e deritanishme.
“Ky aktgjykim ka përcaktuar qartazi se grupi më i madh parlamentar nuk mund të bllokojë konstituimin e Kuvendit, se duhet të sigurojë shumicën e votave të deputetëve ose të arrijë konsensus me grupet parlamentare. Po ashtu, siç e përcakton neni 187 i aktgjykimit, kryesuesi i seancës konstituive duhet të respektojë dispozitat kushtetuese, Kapitullin IV të Rregullores së Punës së Kuvendit dhe praktikat e deritashme parlamentare, si dhe t’i kthehet skenarit të dakorduar të seancës konstituive për të proceduar me votim të hapur”, thuhet në komunikatën e LDK-së.
LDK thotë se është e përkushtuar për formim të institucioneve duke i bërë thirre VV-së që ta respektojë vendimin e Gjykatës Kushtetuese.
“Ftojmë grupin më të madh parlamentar që të veprojnë në përputhje me këtë aktgjykim, t’i ndërpresin bllokimet dhe të kontribuojnë në konstituimin sa më të shpejtë dhe të rregullt të Kuvendit të Republikës së Kosovës”, thuhet nga LDK.
