Lidhja Demokratike e Kosovës ka reaguar pas deklaratës së ngarkuarës me Punë të Shteteve të Bashkuara të Amerikës në Kosovë, duke e cilësuar mesazhin amerikan si një sinjal të qartë për të ardhmen strategjike dhe sigurinë energjetike të vendit.
Në një deklaratë të përbashkët të kandidates për presidente dhe kandidatit për kryeministër, LDK ka vlerësuar se përfshirja e Kosovës në projektet amerikane të gazit nuk është vetëm çështje ekonomike, por pjesë e arkitekturës së sigurisë që SHBA-të po ndërtojnë në Evropë dhe në Ballkanin Perëndimor.
Sipas kësaj partie, siguria energjetike është e lidhur ngushtë me sigurinë kombëtare, ndërsa largimi i Kosovës nga projektet strategjike energjetike gjatë viteve të fundit ka sjellë pasoja ekonomike dhe strategjike për vendin.
LDK ka theksuar se Kosova rrezikon të mbetet jashtë korridoreve strategjike të gazit amerikan dhe jashtë zhvillimeve të reja energjetike në rajon, duke e cilësuar këtë si humbje jo vetëm ekonomike, por edhe të sigurisë kombëtare.
Në deklaratë thuhet se integrimi në projektet energjetike amerikane do të mundësonte diversifikimin e burimeve energjetike, tërheqjen e investimeve të reja, krijimin e vendeve të punës dhe forcimin e partneritetit strategjik me Shtetet e Bashkuara të Amerikës.
LDK ka ritheksuar zotimin se, në rast të ardhjes në pushtet, do të angazhohet për integrimin e Kosovës në projektet rajonale të gazit dhe për realizimin e partneritetit afatgjatë energjetik me SHBA-të.
“Sepse energjia nuk është vetëm ekonomi. Energjia është siguri. Energjia është sovranitet. Energjia është aleancë. Dhe Kosova duhet të jetë pjesë e kësaj aleance, jo jashtë saj”, thuhet në deklaratë./teve1.info/
