Lidhja Demokratike e Kosovës e ka akuzuar kryetarin e Prizrenit, Shaqir Totaj, për keqpërdorim dhe abuzim me tenderë publik, raporton teve1.info
Parmes një konference për medie, zëdhënësi dhe anëtari i kryesisë së degës së LDK-së, Kastriot Jahaj, ka deklaruar se qeverisja komunale në Prizren, nën udhëheqjen e kryetarit Shaqir Totaj, tashmë është lëshuar në veprime të rënda korruptive përmes tenderëve milionësh dhe shitjes së vendeve të punës.
“U bëjë thirrje organeve të drejtësisë për veprim të menjëhershëm në rastin e tenderit të shpallur nga Drejtoria e Shërbimeve Publike. Komuna e Prizrenit më datë 18 Nëntor 2022 ka shpallur tender për Rregullimin e ndriçimit publikë për fshatrat Lubizhdë e Hasit në vlerë prej 445.398 Euro dhe Korishë në vlerë prej 523.635 euro.
Sipas tij, edhe pse Komuna e Prizrenit ka një kontratë kornize 3 vjeçare aktive me Nr: 622-20-2058-2-1-1 “Instalimi i ndriçimit publikë dhe riparimi i ndriçimit publikë ekzistues në Komunën e Prizrenit” me vlerë 1.394.853,90 euro e nënshkruar me datë 22.02.2021, Drejtori i Shërbimeve Publike, njeriu më i afërt i Kryetarit Shaqir Totaj, hapë paralelisht tenderin për rregullimin e ndriçimit publikë për vetëm 2 fshatra, Korishë dhe Lubizhdë e Hasit, në vlerë prej 969,033 euro”, ka deklaruar Jahaj, thuhet në komunikatën e lëshuar nga LDK.
Jahaj e ka akuzuar Totajn edhe për, siç ka thënë ai, shitjen e vendeve të punës.
“Një tjetër rast që kërkon vëmendjen e organeve ndjekëse, ka të bëjë me konkursin e fundit për mësimdhënës në Komunën e Prizrenit, ku fatkeqësisht, në këtë kohë krize qytetarët janë bërë kurban i pushtetit të etur, duke i vjelur gjepat e atyre që kanë nevojë për një vend pune.
Tashmë kur një pjesë e familjarëve të pushtetarëve janë rehatuar në vende të punës, është alarmante se vendet e tjera kanë filluar t’i shesin. Janë shumë shqetësuese ankesat që kanë ardhur në adresë të Lidhjes Demokratike të Kosovës, dega në Prizren, për vlerat të mëdha të parave që dyshohet se u janë kërkuar aplikantëve në konkursin për mësimdhënës. Po flasim për shitje të vendeve të punës nga pushteti komunal!”, ka thënë Jahaj.
Sipas tij, Komuna e Prizrenit ka regjistruar po ashtu 20% suficit buxhetor për vitin 2022.
“Ua kthejmë në vëmendje deklaratën e vetë z. Shaqir Totaj në kohën e fushatës zgjedhore. Ai kishte deklaruar atëherë se “Çdo suficit i buxhetit mbi 9%, është indikator i korrupsionit në menaxhim të parasë publike”. Në bazë të kësaj, Totaj dhe i gjithë kabineti qeverisës në Prizren duhet të cilësohen si qeverisje e korruptuar ngase suficiti i buxhetit komunal për vitin që e lamë pas ishte 20%”, ka deklaruar Jahaj.
Dega e Lidhjes Demokratike të Kosovës në Prizren i ka bërë thirrje organeve të rendit dhe ligjit që me urgjencë t’i trajtojnë çështjet që i ka ngritur dhe të merren sa më parë masa ligjore ndaj shkelësve të ligjit dhe atyre që po keqpërdorin pozitën zyrtare për përfitime personale apo grupore.
