Procesit të votëbesimit mëzi i mbijetoi.
Por, vetëm gjashtë muaj me pas, Lumir Abdixhiku, para vetës do ta ketë sfidën e njëjtë.
Kjo meqë, Lidhja Demokratike e Kosovës, të hënën caktoi datën për Kuvendin e Jashtëzakonshëm.
Kështu fati politik i kryetarit Abdixhiku, do të vendoset në peshore edhe një herë të enjten në ora 18:00.
“Në funksion të garantimit të rregullsisë, ligjshmërisë dhe integritetit të procesit, Sekretariati i Përgjithshëm i LDK-së ka kryer verifikimin e të gjitha nënshkrimeve të dorëzuara, në përputhje me dispozitat e Statutit. Nga ky proces është konstatuar se është përmbushur kriteri statutar prej së paku një të tretës (1/3) të delegatëve të Kuvendit, të nevojshëm për thirrjen e Kuvendit të Jashtëzakonshëm. Lidhja Demokratike e Kosovës mbetet e përkushtuar që i gjithë ky proces të zhvillohet në përputhje të plotë me Statutin e partisë, me parimet demokratike, transparencën institucionale dhe respektimin e vullnetit të delegatëve të Kuvendit”, kanë njoftuar nga LDK.
E deri të kjo, erdhi pasi të pakënaqur me rezultatin e zgjedhjeve të 7 qershorit, rreth 150 delegatë të kërkuan shkarkimin e Abdixhikut nga pozita e kryetarit.
Por, ky i fundit, sipas kryediplomatit në detyë Glauk Konjufca, ka vullnet më të lartë për bashkëpunim në formimin e institucioneve të reja.
“Sa i përket takimeve që ndodhën me PDK-në dhe LDK-në, u pa një gjë e qartë aty se PDK-ja më shumë qëndron në pozicionet që i kemi parë më moti. Ato janë pozicione të vjetra që i kemi parë dhe ato u shprehen edhe në takim me Kurtin. Kurse, sa i përket LDK-së, përshtypja jonë është që aty përkundër herave të kaluara, kësaj radhe ka vullnet më të madh për ta tejkaluar këtë moment në të cilin ndodhet Kosova”, ka thënë Konjufca.
Ky kuvend i jashtëzakonshëm, vjen vetëm 7 ditë para seancës konstituive të Kuvendit të Kosovës.
Ndryshe, më 31 janar të këtij viti, në procesin e votëbesimit, pro kryetarit Lumir Abdixhiku votuan 164 delegatë ndërsa 136 kundër.
