Ministri i Jashtëm rus, Sergej Lavrov, tha të martën se qëndrimi i SHBA-së për konfliktin në Ukrainë bazohet në njohjen e “realiteteve në terren” dhe refuzimin e anëtarësimit të Ukrainës në NATO.
Në një intervistë për Channel One, Lavrov tha se këto parime ishin pjesë e diskutimeve të fundit mes zyrtarëve rusë dhe amerikanë, përfshirë takimin e Steve Witkoff dhe Jared Kushner me Presidentin Vladimir Putin në Moskë.
“Mund t’ju them me siguri se përmbajtja e asaj që u diskutua bazohet në qëndrimin që Presidenti Trump vendosi për Ukrainën menjëherë pas kthimit në Zyrën Ovale”, tha Lavrov, citon Anadolu.
Sipas tij, Trump ka kërkuar që të braktisen përpjekjet për anëtarësimin e Ukrainës në NATO. “Ai (Trump) tha, para së gjithash, se ata duhet të harrojnë përpjekjen për ta sjellë Ukrainën në Aleancën e Atlantikut të Veriut”, tha Lavrov.
Lavrov tha gjithashtu se “realitetet në terren” lidhen jo vetëm me territorin, por edhe me njerëzit dhe preferencat e tyre politike.
Ai hodhi poshtë spekulimet mbi bisedimet e Witkoff dhe Kushner në Moskë e Kiev, si dhe raportet se negociatat Rusi-SHBA-Ukrainë do të rifillonin pas zgjedhjeve parlamentare të Rusisë më 20 shtator.
