Lavrov u pyet të hënën në televizionin shtetëror rus për perspektivat e Luftës së Tretë Botërore dhe përgjigja e tij shënon një përshkallëzim të rëndësishëm në retorikë.
“Rreziqet tani janë të konsiderueshme,” tha Lavrov, sipas transkriptit të intervistës së ministrisë, raporton Reuters.
“Rreziku është serioz, real. Dhe ne nuk duhet ta nënvlerësojmë atë,” tha Lavrov. “NATO, në thelb, është përfshirë në një luftë me Rusinë përmes një përfaqësuesi dhe po e armatos atë përfaqësues. Lufta do të thotë luftë.”
SHBA po pret bisedimet e mbrojtjes të fokusuara në Ukrainë në bazën e saj ajrore Ramstein në Gjermani, ku ministrja gjermane e Mbrojtjes Christine Lambrecht njoftoi se Berlini do t’i dorëzojë Ukrainës tanket anti-ajrore Gepard, raporton CNN, transmeton teve1.info
Dhe të hënën, Sekretari amerikan i Mbrojtjes Lloyd Austin tha në mënyrë eksplicite se SHBA dëshiron të shohë dobësimin e aftësive ushtarake të Rusisë.
“Ne duam ta shohim Rusinë të dobësuar deri në atë shkallë që nuk mund të bëjë ato gjëra që ka bërë në pushtimin e Ukrainës”, tha Austin në një konferencë shtypi pasi udhëtoi për në Kiev për të takuar presidentin ukrainas Volodymyr Zelensky.
“Pra, ajo ka humbur tashmë shumë aftësi ushtarake. Dhe shumë nga trupat e saj, sinqerisht,” shtoi Austin. “Dhe ne duam t’i shohim ata të mos kenë aftësinë për ta riprodhuar shumë shpejt atë aftësi.”
