Njëherit, Latifi ka kërkuar që sa më shpejt të hapet aplikimi për pagesa direkte, derisa ka shtuar se duhet të ketë trajtim më të veçantë edhe sigurimi i kulturave bujqësore.
Nëse bujqësia është prioritet për Komunën e Rahovecit dhe për Qeverinë e Kosovës, atëherë vërtetë duhet t’i japin zgjidhje disa problemeve njëherësh. E para, duhet të ndajnë fonde speciale për kanalet e kullimit të tokave bujqësore, sidomos në trevat ku punohet, siç është Komuna e Rahovecit me rrethinë. Pastaj, duhet të mos vonohen në shpalljen e aplikimit për pagesa direkte ose subvencione direkte. Duhet po ashtu t’i japim një trajtim më të veçantë edhe situatës së lidhur me sigurimin e kulturave bujqësore. Për shembull, duhet më shumë ta afirmojmë nevojën dhe domosdoshmërinë e nxjerrjes së kartelës së sigurimit bujqësor, në mënyrë që fermerët edhe kur dëmtohen ta kenë një garanci të dëmshpërblimit të dëmeve”, deklaroi Latifi në emisionin “Infonata” në Tëvë1.
Madje, i pari i Rahovecit tha se Qeveria e Kosovës përmes Ministrisë së Bujqësisë, duhet t’i japin përkrahje më shumë vreshtarëve, prodhuesve vendorë si dhe përkrahje më direkte Qendrës së grumbullimit të pemëve dhe perimeve./teve1.info/.
