Sipas menaxhmentit, që nga mbajtja e grevës në muajin gusht të vitit 2019, punëtorët e ANP “Adem Jashari” janë përballur me presion për t’u larguar nga Sindikata.
“Kjo kallxon sa të duash sa e tmerrshme është, sa vepër penale është kjo të ju bëhet presion dhe të ju imponosh punëtorëve të hyjnë ose të largohen prej Sindikatës. Kjo është shkelje e Ligjit sindikal”, tha Latifi në emisionin “De Jure” në Tëvë1.
Këtë deklarim, Latifi e bëri kur u pyet lidhur me një audio-incizim që iu prezantua emisionit, ku dëgjohet shefja e ndërrimit Gentiana Terpeza në një takim me punëtorët, të cilëve u kërkon që të largohen nga sindikata, në të kundërtën do të ketë pasoja.
“Kam një porosi prej Norës, sigurisht për këtë çështjen e kërkesës së Sindikatës, Ministria e Mirëqenies Sociale ia ka kthyer sindikatës që nuk ka baza për kërkesat e Sindikatës edhe me ia nis me u tërheq prej Sindikatës, përndryshe ka me pas efekte shumë negative. Human Resource e ka përgatitur një letër për me e nda zyrtarisht me juve, këto janë tri kopje të cilat mundeni me i lexu edhe ju vet. Përndryshe, drejtohuni tek Human Resource kush do me u tërheq. Unë e përcjelli, nuk e di a më dëgjove, kjo është porosi prej Norës. Nora nuk është për momentin në punë. Duhet me ju drejtu Norës. Nuk janë këto fjalë, po besoj unë të Norës. Më falni atëherë, unë veç po e përcjell porosinë, ama për këto pyetje që po m’i drejtoni mundeni me i thënë Norës”, thuhet në atë audio.
Menaxhmenti i Limak Kosovo International Airport i ka ndaluar hyrjen në zyrën e Sindikatës kryetarit Latifi, pasi që ai është larguar nga puna, kjo në kundërshtim me statutin e shoqatës.
“Tash ne aktivitetin e bëjmë qysh të mundemi, me telefona, nëpër kafe, në parking të kerreve në aeroport, para terminali, ku të mundemi. E bëjmë aktivitetin, i marrim ankesat, i drejtojmë kërkesat tek punëdhënësi, i drejtojmë tek Inspektorati i Punës sepse vazhdimisht ka shkelje të të drejtave të punëtorëve në vendin e punës në Aeroport sot e kësaj dite”, tha ai në emisionin “De Jure” në Tëvë1.
Për më shumë, ndiqeni hulumtimin “Hakmarrja e Limak-ut ndaj punëtorëve”, i cili transmetohet në “Tëvë1” dhe “Betimi për Drejtësi”./Tëvë1/
