Hendbollistët e Kombëtares së Kosovës, të dielën mbrëma kanë nisur grumbullimin për dy ndeshjet e fazës së dytë kualifikuese për Botërorin 2027.
Të dyja ndeshjet, Kosova i luan kundër Bosnjë e Hercegovinës, dhe për këtë arsye kjo vlerësohet si java e hendbollistëve “Dardan”.
Kosova edhe të hënën e martën do të përgatitet në Prishtinë, përpara se të mërkurën të niset drejt Tuzlas së Bosnjë e Hercegovinës.
Ndeshjen e parë, Kosova e luan të enjten nga ora 20:00 në arenën “Mejdan” në Tuzla kurse të dielën prej orës 17:00, është ndeshja e kthimit që luhet në Prishtinë.
Kombëtarja më e suksesshme pas këtyre dy ndeshjeve, do të avancojnë në fazën e tretë dhe të fundit kualifikuese, ku e presin përballjet me Ishujt Faroe.
Kosova e ka kaluar me sukses fazën e parë kualifikuese, duke e eliminuar Britaninë e Madhe që e mposhti dy herë.
