Kryetari i komunës së Rahovecit, Smajl Latifi ka thënë se viti 2023 ka qenë një vit i vështirë për shkak të dëmeve që janë shkaktuar nga vërshimet në këtë komunë.
Ai në emisionin “Info Nata” në Tëvë 1 tha se pavarësisht dëmeve të shumta puna në këtë komunë nuk është ndalur.
“Viti 2023 ka qenë vit i plot vështirësive, i plotë angazhimeve, i dinamikave të mëdha, të pandalshëm kemi qenë. Kemi pasur dëme shumë, bie fjala në bujqësi, pastaj dëme edhe në plot aspekte të tjera të cilat lidhen edhe më fatkeqësitë natyrore, fermerët janë dëmtuar, vreshtat janë dëmtuar, perime-kultura, por sidoqoftë puna nuk është ndal, as nga qytetarët as nga udhëheqja komunale”, tha ai.
Latifi tha se gjatë kësaj periudhe kanë arritur që digjitalizimin në ndriçimin publik ta shpërndajnë në 35 vendbanime, që sipas tij është një arritje e jashtëzakonshme.
“E kemi zbatuar një program të efiçiencës së energjisë që lidhet me Fondin e Kosovës për Efiçiencë të Energjisë e që ka të bëjë me izolimin, termoizolimin, riparimin e nyjeve sanitare, ndërrimin e dyerve dhe dritareve…objektet që janë ndërtuar kaherë, po bëhen sikurse të jenë të reja, sigurisht kjo e kursen energjinë. Me ndriçim publik kemi shënuar një arritje të jashtëzakonshme për shkak se po zbatohet digjitalizimi i ndriçimit publik,si i vetmi projekt, pra si projekti i parë në Kosovë, ku dritat edhe janë efiçiente, digjitale dhe smart, drita me aplikacion…Në 35 vendbanime përfshirë edhe qytetin po zbatohet me sukses të plotë digjitalizimi i ndriçimit publik, si dhe ndriçimi në ato pjesë ku ka munguar”./teve1.info
