Përsëri në kryeqytet, vetëm se këtë here në një lokacion ndryshe, u dyshua për një mjet shpërthyes.
Pistë dyshimi të martën ishte shkolla e mesme “Xhevdet Doda” në Prishtinë, kurse të gjithë nxënësit e shkollës dhe personeli u evakuuan sapo erdhi njoftimi.
E alarmi për bombë dyshohet se është dërguar përmes postës elektronike.
“Sot rreth orës 11:00 është pranuar informata për dyshimet që ndërlidhen me një shpërthim të mundshëm në shkollën “Xhevdet Doda” në Prishtinë. Informacionet e para flasin se kanosja e dyshimtë ka ardhur përmes postës elektronike. Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën në atë zonë”, thuhet në njoftimin e Policisë
E me të arritur në vendin e ngjarjes organet e rendit kanë caktuar një perimetër sigurie.
Policia e Kosovës kanë nisur ndërmarrjen e veprimeve operative të nevojshme për të menaxhuar situatën në atë zonë.
Pas disa orëve kërkim brenda dhe jashtë objektit Policia e Kosovës nuk gjeti asnjë mjet shpërthyes.
Një alarm tjetër për bombë erdhi përmes postës elektronike, të martën, më 17 maj, për në objektin e Rektoratit të Universitetit të Prishtinës “Hasan Prishtina”, ku po ashtu nuk u gjet asnjë mjet shpërhtyes.
Raporti i gazetares Valëza Sylejmani.
