Policia e Kosovës ka njoftuar se disa arinj, të cilët ishin parë ditëve të fundit në fshatin Bellobrad të Dragashit, tashmë janë larguar dhe janë kthyer në arealin e tyre natyror.
Sipas njoftimit zyrtar, arinjtë janë ushqyer në vendbanimin e tyre në pyje dhe janë marrë masa për të siguruar që të mos rikthehen në zonat e banuara.
“Pas pranimit të një ankese dhe kërkese për intervenim nga drejtori i shkollës së fshatit, policia ka ndërmarrë menjëherë masat e nevojshme. Policia, konkretisht Stacioni Policor në Dragash, fillimisht ka shtuar patrullimet policore në zonën e fshatit Bellobrad dhe ka njoftuar për bashkërendim institucionet përgjegjëse:- Agjencinë për Mbrojtjen e Mjedisit të Kosovës, – Drejtorin e Parkut Kombëtar “Sharri”, – Drejtorin Komunale për Bujqësi, Pylltari dhe Zhvillim Rural dhe- Shoqatën e Gjuetarëve “Dhia e Egër” nga Dragashi. Nga Shoqata e Gjuetarëve “Dhia e Egër” është konfirmuar se aksioni për largimin e arinjve është përfunduar me sukses. Arinjtë janë kthyer në arealin e tyre natyror në pyje dhe janë ushqyer në vendbanimin e tyre, duke siguruar që të mos rikthehen në zonat e banuara”, thuhet në njoftim.
Policia ka njoftuar banorët e Bellobardit dhe rrethinës se arinjtë janë larguar dhe zona është e sigurt për qytetarët.
“Falënderojmë të gjitha institucionet dhe shoqatën e gjuetarëve për bashkëpunimin e treguar në këtë rast”, theksohet në fund të njoftimit.
