Nën këtë emblemë luftuan për atdheun.
Heroizmi i tyre që solli lirinë e Republikës u përjetësua edhe në lapidarin që i përkujton dëshmorët e Burojës së Skenderajt të vrarë gjatë viteve 90-ta.
Për ti nderuar ata një nga një erdhën të rinj e të moshuar. Që të gjithë krenarë vështruan mbi emrat e çlirimtarëve që u zbuluan nën intonimin e himnit kombëtar.
Pllaka ishte ndërtuar me kontributin e fshatarëve.
“Janë masakru 53 martirë, kanë ra 4 dëshmorë. Fshati Burojë i ka dhanë shumë kësaj toke. Jena organizu me kryesinë e fshatit kena kontribui vet me vetëfinancim që kanë luftu për këtë tokë e kemi bo”, tha Naim Hoti, veteran i UÇK-së.
Në mesin e atyre që u masakrua ishte edhe gjyshja e tij 99 vjeçare.
“99 vite e preme e masakruar në mënyrën më barbare. Ka edhe fëmijë prej 6 muajve dhe 3 muajve”, tha Hoti.
Me dhimbje të bëmat e serbëve gjatë luftës i kujton edhe i mbijetuari i masakrës së Izbicës, Milazim Thaçi.
“Tetë anëtarë të familjes së ngushtë, një grua u masakra dhe u djeg në shtëpi të veti. Krejt kemi dhanë shumë por Kosova ka dhanë ma së shumti, edhe në Izbicë edhe këtu edhe tona anët. Sot po vuajnë djemtë tanë ma të mirë që na kanë çlirua neve”, tha Milazim Thaçi i mbijetuar i luftës.
Thaçi si mban lotët, kur flet për ish krerët e Ushtrisë Çlirimtare të Kosovës që po gjykohen në Hagë.
MILAZIM THAÇI-I MBIJETUAR I LUFTËS
“Po maj ymyt që kanë me u shpall të pafajshëm, edhe kanë me u kthy në familjen e tyne si ma mirë”, shprehet ai.
Edhe i pari i Komunës, përmendi ish presidentin Thaçi teksa foli për hisen që ka Buroja në rrugën drejt shtet-formimit të Kosovës.
“Sot, bashkë me ju po e përjetësojmë një pjesë të historisë sonë të dhimbshme por edhe krenare, pllakën përkujtimore në të cilën janë të skalitura të gjithë emrat e atyre që derdhën gjakun për lirinë kolektive. Një pjesë të historisë të cilën i biri i Burojës vazhdon ta mbrojë me dinjitet të drejtën e lirisë së Kosovës”, u shpreh Nura.
Kjo ngjarje i mblodhi bashkë zyrtarë komunalë, familjet e dëshmorëve, përfaqësues të shoqatave të dala nga lufta, veteranë të UÇK-së dhe një numër i madh i qytetarëve vendës dhe fshatrave përreth.
