Krijimtaria muzikore në Kosovë tani e tutje do të jetë më e mbrojtur se kurrë.
Pikërisht për këtë, sot u bë lansimi i organizatës për menaxhimin kolektiv të të drejtave për muzikë, një bashkëpunim mes Ministrisë së Kulturës dhe Sportit (MKRS) dhe Kosova Music Rights Society (KMRS).
Figura politike, artistë, prokurorë e avokatë u bashkëngjiten në këtë event, në përpjekje për të përkrahur nismën.
Ndër ta ishte edhe kryeministri në detyrë, Albin Kurti i cili tha se kjo çështje i takon edhe aspektit moral, përveç atij ligjor.
“Sot shënojmë një hap përtej muzikës, në thelb të këtij krijimi të KRMS dhe punës që i prin para qëndron një ide më e madhe, ajo e të drejtës për të zotëruar frytin e punës sonë. Për të fituar edhe autori nga dobia publike. Kjo nuk është vetëm çështje ligjore, por, edhe morale, kulturore e filozofike. Shoqëria që e njeh dhe e mbron krijimtarinë është shoqëri qe beson në vetvete. Shoqëri që beson në të tashmen dhe të ardhmen e saj. Po ashtu, është shoqëri që respekton artistë, jo vetëm që i donë ata”, tha Kurti.
Ai përmendi edhe instrumentin tradicional të popullit shqiptar, çiftelinë, që të demonstrojë sa e rëndësishme është të mbrohet ajo që i takon autorit.
Ndërsa kryesuesja e KMRS dhe iniciatorja e kësaj nisme, Kaltrina Mehmeti, potencoi se ka ardhur koha që artistët të marrin meritat e takuara.
“Autorët dhe kompozitorët nuk janë gjithmonë figura publike, ata nuk performojnë gjithmonë në koncerte apo klube nate, shpesh veprat e tyre bëhen pjesë e një ekonomie pa pjesëmarrjen e tyre fizike. Kur një autor apo kompozitor krijon një vepër, ai duhet të kompenzohet. Kjo është e drejta e autorit. Kjo nevojë urgjente për mbrojtjen e të drejtave të autorit solli lindjen e organizatës KMRS”, tha ajo.
Në mesin e tyre ishte edhe Sekretari i Përgjithshëm i Kulturës, Besnik Bislimi, i cili njoftoi se organizata e re do të menaxhojë lejimin zyrtar të përdorimit të veprave të muzikës në performanca publike, transmetime, platforma online.
“Organizata e re për menaxhimin kolektiv do të shërbejë si organizëm i autorizuar për menaxhimin e të drejtave të autorit dhe të drejtave të përafërta në fushën e muzikës, në emër të autorëve, kompozitorëve, interpretuesve dhe producentëve. Ajo do të menaxhojë lejimin zyrtar të përdorimit të veprave të muzikës në performanca publike, transmetime, platforma online dhe forma të tjera të përdorimit komercial, do të mbledh dhe shpërndajë të ardhurat me transparencë dhe të sigurojë që përdorimi i veprave të krijuesve të jetë në përputhje me legjislacionin e Republikës së Kosovës”, potencoi Bislimi.
Në Kosovë për herë të parë janë miratuar këtë vit tarifat për të drejtat e autorit për shumicën e përdoruesve të muzikës, e bëri të ditur Kaltrina Mehmeti në konferencë. Duke filluar nga janari i vitit 2026 fuqizohet ky projektligj, duke bërë që përdoruesit e muzikës të detyrohen të autorizohen për përdorimin e muzikës dhe të kryejnë obligimet e tyre financiare.
