Në seancën e sotme në Kuvend, Lala theksoi se duhet të kuptohet njëherë e përgjithmonë se egjiptianët, si dhe ashkalinjtë e romët janë qytetarë të Kosovës, shkruan teve1.info
“Atdheu i vetëm i tyre është Kosova, atdhe për të cilin ata kanë kontribuar me shekuj nga ndjenja e përkatësisë ndaj shtetit të Kosovës. Është obligim shtetëror i yni që të ofrojmë të drejta dhe mundësi të barabarta për secilin qytetar dhe në këtë aspekt nuk tolerohet asnjë kompromis apo preferencë selektive. Në kohë të vështira komuniteti egjiptian ka jap mësues të shquar për vendin andaj në asnjë rethanë nuk lejojmë përjashtimin e tyre nga sistemi arsimor sot”, tha Lala.
Deputeti Lala i bëri thirrje Ministrisë së Arsimit që të ketë një sistem arsimor gjithëpërfshirës, pasi siç thotë ai, ka ende mësues që bëjnë dallime etnike.
Sipas tij, këta mësues duhet të mbahen sa më larg fëmijëve.
“Prandaj u bëj thirrje Ministrisë së Arsimit dhe kolegëve të mi deputetë nga Komisioni për edukim dhe arsim që të angazhohen intensivisht në arritjen e sistemit edukativo-arsimor gjithëpërfshirës, ngase fatkeqësisht në sistemin tonë arsimor akoma kemi mësues që bëjnë ndasi etnike, dallime klasore, linçime, përjashtime sociale e edhe i ulin fëmijët e komuniteteve në fund duke i demotivuar totalisht ata fëmijë për të vijuar mësimet. Ata mësues e kanë vendin gjithkund tjetër përveç në shkolla, dhe ne të gjithë së bashku duhet të angazhohemi që ata t’i mbajmë sa më larg fëmijëve”, shtoi ai. /Teve1.info/
