Kryetari i komunës së Preshevës, Shqiprim Arifi po pretendon se Fondi 1.3 milionë eurosh i ndarë për Luginën e Preshevës është keqpërdorur nga njerëz të afërt me kryeministrin Kurti. Njëri prej personave që ka përfituar nga ky fond sipas Arifit është edhe aktori Gani Veseli. Sipas tij atij i ishin dhënë afër 50 mijë euro për vetëm 5 vjersha.
Megjithatë aktori Veseli në një prononcim për teve1.info i ka quajtur këto deklarata skandaloze. Ai ka thënë se i ka marrë paratë për t’i realizuar 5 filma të metrazhit të mesëm.
“Është e vërtetë se jam akuzuar se kam fituar projekt për 5 vjersha siç e thotë kryetari Arifi por këto janë deklarata skandaloze që çdokush sigurisht që e ka dëgjuar nuk e ka marrë për serozitet sepse e dinë, të gjithë bota e dinë që për 5 vjersha nuk i jep dot askush as 30 mijë as 40 mijë euro. Prandaj këto janë gënjeshtra dhe sulme shumë të ulëta nga kryetari Arifi për shkak se unë ju sqaroj se unë si aktor kam marrë këtë projekt për realizimin e 5 filmave që janë filma të metrazhit të mesëm 35-40 minuta që do të marrin pjesë të gjithë aktorët e Preshevës, Luginës së Preshevës por do të marrin pjesë aktorë nga Maqedonia e Kosova, pasi që nuk mbulojmë dot vetëm me aktorët nga Lugina sepse është numri i pakët”, ka thënë Veseli.
Sipas tij këto filma do ta kenë mundësi t’i shohin të gjithë
“Realiteti i krejt këtij projekti është se do të jenë filma, tregime popullore që do të realizohen dhe do të kenë mundësi ta shohin të gjithë, edhe përmes Youtube, pse jo edhe përmes televizioneve të tjera”.
Tutje ai ka thënë se e kupton pse Arifi po i bën këto sulme.
“Prandaj këto sulme që u bëhen njerëave intelektualë që i ka Presheva, bëhet dhe ndodh veç tek ne. Është për keqardhje, është skandaloze të bësh një inskenim, diçka e panevojshme dhe më vjen keq prej të gjithë qytetarëve të Kosovës. Sot nuk po i përgjigjem atij por të gjithë qytetarëve të Kosovës që i kërkoj ndjesë se poi shqetësojmë me këto gjëra sepse janë të panevojshme. Unë e kuptoj z. Arifi, unë e kuptoj sepse është i izoluar nga politika shqiptare qoftë në Kosovë dhe Shqipëri dhe nuk i vjen dot ndonjë politikan për ta takuar”, tha Veseli për teve1.info
Ndryshe Arifi dorëzoi dje kallëzim Penal në Prokurorinë Speciale në Prishtinë për t’i hetuar pretendimet e tij.