Për këtë projektligj, vetëm 52 deputetë kanë votuar për, kurse shtatë nga Lidhja Demokratike e Kosovës votuan kundër, teksa ata të Partisë Demokratike të Kosovës abstenuan.
Ministrja e Drejtësisë, Albulena Haxhiu, deklaroi se përmes këtij projektligji bëhet deklarimi dhe verifikimi i pasurisë për çdo vit.
“Përmes këtij Projektligji mundësohet deklamimi i pasurisë ‘online’ me qëllim që të evitohet çdo gabim potencial dhe të kontribuojë në ngritjen e transparencës dhe përcjelljen e trendeve të pasurisë së zyrtarëve publik.
Të dhënat e regjistruara në këtë databazë do të jenë lehtësisht të transferueshme në institucionet e tjera ligj zbatuese për qëllime të hetimit penal, apo administrativ… Janë konsideruar se janë dy profesione të ndjeshme dhe duhet të përfshihen në deklarimin e pasurisë, por jo që deklarimi i tyre të bëhet publik, por të mbetet vetëm në Agjencinë Kundër Korrupsionit”, tha ajo.
Ndërkaq, Shefi i Grupit Parlamentar të PDK-së, Abelard Tahiri, thekson se megjithëse është i nevojshëm ky projektligj, duhet të largohet deklarimi i pasurisë nga mjekët dhe profesorët.
“Çështja e deklarimit të mjekëve të licencuar që ushtrojnë veprimtarinë publike në nivelin dytësor dhe terciar, po ashtu problematike është çështja e deklarimit të pasurisë së profesorëve në universitete publike, duke përfshirë profesorin-asistent dhe të rregullt.
Këto kategori duhet të largohen nga ky projektligj. Nuk mendoj se këto kategori janë të ekspozuara ndaj korrupsionit”, tha ai.
Vërejte të njëjta shprehu edhe deputet i LDK-së, Driton Selmanaj.
“Pse mjekët dhe profesorët dhe sidomos pse ekspertët e psikiatrisë forenzike? Pse janë këto kategori të rëndësishme që shteti të kuptojë nivelin e pasurisë që e kanë ata”, shtoi ai.
