Qalaj tha se mësimdhënësit janë quajtur analfabetë nga njerëz e organizata të afërta me Qeverinë e Ministrinë e Arsimit, të cilët sipas Qalajt kanë përfituar shumë miliona nga Qeveria për rritje të cilësisë në arsim.
“Si ke mundur të qëndrosh aq komod kur e di që nuk është duke u mbajtur mësimi në shkolla. Asnjëherë nuk e ke ngritur zërin kundër akuzave e fyerjeve që po i bëhen mësimdhënësve, por duket sikur po bëhet një front i përbashkët me një mision të vetëm për denigrimin e mësimdhënësve të Kosovës të cilët dashurinë e sakrificën për shkollën e kanë treguar gjatë gjithë historisë së funksionimit të shkollës shqipe.
Mësimdhënësit janë quajtur kriminel, analfabetë, të lidhur me politikën serbe e çka jo tjetër, dhe jo rastësisht po thuaj të gjitha këto akuza e fyerje janë bërë nga eksponent të afërt me Qeverinë e Ministrinë e Arsimit, përfitues të fondeve nga ministria apo partnerë të ministrisë në projekte të ndryshme arsimore. Ju me mosdistancimin e këtyre ndaj mësimdhënësve sikur keni legjitimuar patronitetin që e keni në këtë fushatë të ndytë e që për qëllim keni demonizimin e figurës së mësimdhënësve”, tha Qalaj.
Ndërsa,ministrja Arbërie Nagavci,iu ka përgjigjur duke i thënë se partia e Qalajt e ka sjellë cilësinë e arsimit në këtë gjendje.
“Ka përfunduar koha kur ju mund të flisni këtu çfarë të keni dëshirë në mënyrë që t’i bindni të tjerët. Çka do që ke adresoj, kam punuar më shumë se 20 vite në mësimdhënie, jam vajzë e dy mësimdhënësve.
Është e vërtetesë që arsimi nuk është ai që e dëshirojmë dhe si shkak e ndërhyrjeve brutale që i keni pas. Ndërkaq sa i përket çështjes së mësimdhënësve, respekt e mirënjohje për pjesën dërmuese të mësimdhënësve, keqardhje për situatën që na e kanë sjellë në mënyrë brutale, në radhë të parë të PDK-së e pastaj të gjithë qytetarëve”, tha Nagavci.