Janë në kërkim të një lokacioni të duhur për të hapur një market social në Prishtinë, brenda së cilit mund të furnizohen rastet sociale. Iniciativë kjo e komunës së bashku me organizatat jo-qeveritare.
Deri më tani zyrtarë komunal thonë se kanë hartuar një koncept- dokument, pas së cilit edhe pritet të bëjnë shpërndartjen e kuponëve tek familjet përfituese.
“Koncept-dokumentin e kemi hartu, në të njëjtën kohë jemi në kërkim të lokacionit të përshtatshëm nëpërmjet ndërmarrjes publike banesore në mënyrë që të bëjmë ndërhyrjet e nevojshme infrastrukturore që ta ambientojmë si shitore humanitare për familjet në nevojë dhe kësisoj të fillojmë furnizimin dhe shpërndarjen e kuponëve tek familjet përfituese”, tha zyrtari në Komunën e Prishtinës, Premtim Fazliu.
Për fazën fillestare, për familjet sociale do të dhurohen produktet bazë të shportës familjare.
Ndërkaq përfituese do të jenë 100 familje.
E këtë vendim të komunës së Prishtinës e mirëpritën qytetarët.
Por jo të gjithë besojnë se familjet sociale do të ndihmohen.
Nga viti 2019 në Prishtinë është themeluar edhe Kuzhina Qendrore, e cila furnizon me shujta komunitetin në Prishtinë.
Kronika e realizuar nga gazetarja Albiona Hajdari.
