Kryetari i Kuvendit, Glauk Konjufca, tha se ata janë shembulli i përkryer se si jepet jeta për lirinë e atdheut.
Më pas nisi debati parlamentar për grevat.
Kryeministri Albin Kurti u mor edhe njëherë me terminologjinë “vëlla” të përdorur nga kreu i SBAShK-ut.
“Problematizohet se unë e kam kritikuar kreun e SBASHK-ut që më ka thënë vlla. Unë i kam dy vëllezër, por asnjëri prej tyre nuk kanë ardhur në qeveri, sepse unë besoj që vëllezërit janë për shtëpi. Ka kaluar koha kur janë bërë kryeministrat me vllazni”, tha Kurti.
E deputeti i Partisë Demokratike të Kosovës, Enver Hoxhaj i apeloi Kurtit që të arrijë një zgjidhje kompromisi me sindikatat.
“(Kryeministri) nuk ka nevojë të luajë rolin e të fortit në raport me sindikatat. Nuk ka nevojë të luajë rolin e të fuqishmit në raport me opozitën. Por ka nevojë të kuptojë se si duket procesi demokratik.”, theksoi ai.
Edhe nga partia tjetër opozitare AAK, i kërkuan Qeverisë të gjejë një zgjidhje të shpejtë me sindikatat.
“Edhe në Kosovë, sindikatat kanë bërë një punë të shkëlqyer ku në secilin qeveri, sindikatat kanë qenë zë i fuqishëm. Nuk është momenti që SBASHK-u dhe sindikatat tjera të goditen në forma të ndryshme. Andaj ju bëj thirrje qeverisë që të ulin tensionet”, tha deputeti Pal Lekaj.
Por Shefja e Grupit Parlamentar të Lëvizjes Vetëvendosje, Mimoza Kusari-Lila tha se greva në arsim është politizuar në skajshmëri.
“Procesi skajshmërisht është politizuar. Kjo u vërejt kur Sindikata e Bashkuar përgjigjet se involvimi i Avokati të Popullit, siç e kanë shkruar ata është një institucion që ka hyrë në rrugën e shantazhit për të përçarë sindikatat”, tha ajo.
E grevën në arsim një deputet i LVV-së po e përjeton rënd.
“Unë jam i trishtuar, të them të drejtën s’më merr gjumi natën kur e di konsekuencën që do të kemi në ardhmërinë e fëmijëve”, u shpreh Jahja Koka.
Mësimdhënësit e të gjitha institucioneve publike në Kosovë janë në grevë, me kërkesën për mbështetje financiare prej 100 eurosh në muaj. Në grevë, nga 25 gushti, janë edhe punëtorët e administratës publike, si dhe shërbyesit civilë në institucione lokale dhe qendrore.
