Një person është arrestuar mëngjesin e sotëm në fshatin Llapushnik të Drenasit, nën dyshimet për asgjësim apo dëmtim të pasurisë dhe armëmbajtje pa leje.
Sipas njoftimit të Policisë së Kosovës, arrestimi është kryer rreth orës 07:00, ndërsa pjesë e aksionit policor ka qenë edhe kontrolli i shtëpisë së të dyshuarit, ku janë gjetur dhe sekuestruar tri armë zjarri.
“Sot rreth orës 07:00, në fshatin Llapushnik të Drenasit, është arrestuar një person i dyshuar për asgjësim apo dëmtim të pasurisë dhe armëmbajtje pa leje. Gjatë kontrollit në shtëpinë e tij janë gjetur dhe sekuestruar tri armë zjarri”, thuhet në njoftimin e Policisë së Kosovës.
I arrestuari është Z.Th., mashkull, 73 vjeç, i cili dyshohet se ka dëmtuar orendi në tri shtëpi. Ai aktualisht ndodhet në intervistim, ndërsa hetuesit policorë, në koordinim me Prokurorin e Shtetit, po vazhdojnë veprimet e nevojshme procedurale.
