Me qëllim të vetëdijesimit të qytetarëve për përdorim sa më të vogël të makinave dhe mjeteve tjera që e ndotin ambientin, përdorim sa më të madh të biçikletave dhe automjeteve me rrymë, 15 komuna të Kosovë e kanë shënuar “Ditën Ndërkombëtare pa Makina”.
Drejtori i Shërbimeve Publike në Prishtinë, Ilirik Musliu, tha se qëllimi i shënimit të kësaj dite është rritja e vetëdijesimit të qytetarëve për lëvizjen a makina.
“Qëllimi i shënimit të kësaj dite është që të bëjmë maksimumin për ta ruajtur shëndetin dhe duhet ta bëjmë maksimumin për ta ndërruar gjendjen në të cilën ndodhemi tani, nga ndotja e ambientit dhe përdorimi i madh i makinave. Transporti publik në Prishtinë është pa pagesë me qëllim të stimulimit dhe vetëbesimit të përdorimit të transportit publik por edhe vetëdijesimi për shfrytëzimin e mjeteve tjera lëvizëse siç janë biçikletat, trotinetet elektrik transporti publik”, tha Musliu.
Kurse, zëvendësministrja e Mjedisit, Planifikimit Hapësinor dhe Infrastrukturës, Linda Çavdërbasha,tha se kjo javë është shumë e rëndësishme për lëvizjen pa makina.
“Është shumë e rëndësishme që kjo javë është festuar edhe vitin e kaluar ku 15 komuna të Kosovë i janë bashkuar kësaj iniciative. Ministria e Mjedisit, Planifikimit hapësinor dhe Infrastrukturës është duke punuar në transportin multimodal, veturat elektrike dhe përdorimin sa më të madh të biçikletave”, tha ajo.
Në Prishtinë u mbajt edhe një parakalim me biçikleta, organizuar nga grupi “Marakli t’biciklave’.