Presidenti i Shqipërisë,Ilir Meta, ka thënë se Kosova është kthyer në një kontribuuese aktive të sigurisë në rajon.
Ajo këto komente i ka bërë me rastin e shënimit të 14 vjetorit të pavarësisë së Kosovës, në një letër urimi dërguar presidentes së Kosovës, Vjosa Osmani.
“Jam i lumtur të konstatoj se Kosova është kthyer në një kontribuuese aktive të sigurisë dhe stabilitetit në rajonin tonë, sikundër jam i sigurtë se kjo ditë e shënuar do të frymëzojë më shumë përpjekje, më shumë unitet dhe më shumë devotshmëri për të vijuar në konsolidimin e mëtejshëm të institucioneve shtetërore, për një Kosovë më të begatë dhe evropiane”, ka shkruar Meta.
Ai ka shprehur përkushtimin për të punuar në thellimin e bashkëpunimit ndërmjet dy vendeve.
Meta po ashtu ka vlerësuar të arriturat në Kosovë, duke thënë se zhvillimi i demokracisë në Kosovë është shembull për tu ndjekur.
“Arritjet e shtetit të Kosovës në drejtim të demokracisë, zgjedhjeve të lira, funksionimit të institucioneve të pavarura dhe mirëqeverisjes, janë mbresëlënëse dhe një shembull pozitiv për tu ndjekur. Vullneti i përbashkët për të forcuar më tej bashkëpunimin dypalësh, në përçim të vlerave më të mira kombëtare dhe evropiane, na angazhojnë të punojmë më shumë në të gjitha rrafshet.
Si President i Republikës së Shqipërisë do të vazhdoj të jem përkrahës i vendosur për thellimin e partneritetit tonë të shkëlqyer”, ka shkruar Meta.
Urime me rastin e 14 vjetorit të pavarësisë së Kosovës, ka shprehur edhe kryeministri i Shqipërisë, Edi Rama dhe kreu i PD-së, Lulzim Basha./teve1.info/.
