Kryeministri i Kosovës, Albin Kurti ka thënë se nuk do të lejojë krijimin e ndonjë forme të Republikës Sërpska në veri të Kosovës. Këtë deklaratë, Kurti e ka bërë për mediumin kroat “Hina”, një ditë para takimit me presidentin serb, Aleksandër Vuçiq, në Bruksel.
Në takimin e së martës mes Kurtit dhe Vuçiqit, do të prezantohet drafti i statutit të Asociacionit të komunave me shumicë serbe, të cilin Kurti ka njoftuar se ende nuk e ka parë.
“Duke marrë parasysh insistimin e Brukselit, do të jem i lumtur të shoh se çfarë drafti kanë përgatitur, edhe pse mendoj se do të ishte më mirë që më parë të ma paraqitnin në Prishtinë. Megjithatë, do të siguroj që të përmbushet ajo që është rënë dakord më 27 shkurt në Bruksel, ekzistenca e një niveli të duhur të vetëqeverisjes së komunitetit serb sipas standardeve më të larta ndërkombëtare evropiane për mbrojtjen e pakicave. Por ajo që ne nuk do të lejojmë është e drejta e territorializimit dhe krijimit të çdo gjëje që do të dukej si Republika Srpska në Bosnje dhe Hercegovinë. Nuk do të lejojmë një parashtet satelitor me esencë shkatërruese që do të minonte shtetësinë e Kosovës”, është shprehur Kurti.
Tutje, kryeministri Kurti ka thënë se dëshiron marrëdhënie normale, evroipiane, e marrëdhënie të mira fqinjësore me Serbinë.
“Vendi ynë, megjithatë, është një vend normal demokratik që u jep të drejta individuale dhe të tjera qytetarëve të tij, por nuk lejon territorializimin në bazë etnike sepse është kundër demokracisë dhe republikës. Sovraniteti dhe integriteti territorial janë diçka që nuk guxon të cenohet. Unë dua marrëdhënie normale me Serbinë, marrëdhënie evropiane, marrëdhënie të mira fqinjësore. Mbrojtja e minoriteteve është e rëndësishme për ne. Por ne nuk mund t’i japim pushtetin ekzekutiv komunitetit lokal sepse pushteti ekzekutiv i takon qeverisë dhe komunave”, ka deklaruar Kurti.
