Rasti i 24 shtatorit e ka shpërfaqë fytyrën e vërtetë, të vjetër e të re të Serbisë në raport me Kosovën. Kështu deklaroi njohësi i marrëdhënieve ndërkombëtare, Driton Lajçi.
Madje sipas tij, sumi terrorist në Banjskë të Zveçanit nuk ishte sulm vetëm ndaj Kosovës, por ishte atak ndaj KFOR-it, EULEX-it dhe vlerave të Bashkimit Evropian.
“Dhe jo vetëm në raport me Kosovën, ai ka qenë atak edhe në drejtim të forcave ndërkombëtare në Kosovë, edhe KFOR-it, edhe EULEX-it, gjithashtu ka qenë sulm në një prej vlerave kryesore që ka Bashkimi Evropian. Vlerë të cilën janë munduar që ta zbatojnë e ajo është pajtimi ndërmjet shqiptarëve shumicë dhe serbëve. Janë mbajtur me vite të tëra, me dekada projekte, programe për diversitetin kulturor, etnik krijimi i raporteve të mira, shtensionimi i situatës duke pa dallimin si vlerë etj. Dhe në një moment të caktuar brenda një dite, ne e shohim se Serbia e përdorë jo vetëm politikën, diplomacinë, ekonominë, por e përdorë edhe forcën ushtarake në drejtim të Kosovës dhe Bashkësisë Ndërkombëtare në Kosovë”, tha Lajçi në emisionin “ReSpublika” në Tëvë1.
Tutje Lajçi tha se beson që tashmë edhe Bashkësia Ndërkombëtare e kanë pa si sulm të Serbisë edhe ndaj tyre, pasi sipas tij, këtë po e vërteton edhe aktivizimi i lidershipit në samite të rëndësishme të BE-së.
“Ky ka qenë sulm edhe vet ndaj atyre dhe unë e besoj se ata e kanë pa si të tillë. Prandaj edhe aktivizimi i lidershipit të Bashkimit Evropian kohëve të fundit, e pamë në Shqipëri e pamë në Spanjë, pastaj edhe tash në Bruksel në disa samite të Bashkimit Evropian me mbështetje te SHBA-ve. U pa se roli i Serbisë është destruktiv, është agresiv dhe vazhdimisht do të përpiqet që të minojë rrolin e forcave ndërkombëtare në Kosovë”, shtoi Lajçi.
Ndryshe, sulmi në Banjskë u përshkrua si një nga incidentet më të rënda ndër vite dhe ndodhi pas disa muajsh tensione të larta midis Kosovës dhe Serbisë.
Më 24 shtator grupe të armatosura sulmuan Policinë e Kosovës në fshatin Banjskë të komunës së Zveçanit, duke vrarë rreshterin Afrim Bunjaku.
Në shkëmbimin e zjarrit që pasoi, u vranë edhe tre sulmues të nacionalitetit serb./teve1.info./