Ndërmjetësuesi i BE-së për dialogun, Miroslav Lajçak, ka reaguar sërish për sulmin ndaj Policisë së Kosovës, ku një polic mbet i vrarë, një i plagosur dhe një tjetër i lënduar.
Lajçak, para pak minutave ka publikuar një postim në Facebook, ku ka përmbledhur javën e diskutimeve dhe vizitën në New York, shkruan teve1.info
Emisari në këtë postim nuk ka dhënë detaje mbi zhvillimet e sotme që kanë ndodhur në veri të Kosovës, por ka kërkuar që palët të rikthehen në dialog dhe të parandalojnë dhunën.
’’Me t’u kthyer nga Nju Jorku këtë mëngjes, më takoi lajmi tronditës për një sulm ndaj policëve të Kosovës në veri të Kosovës. Një akt i tillë frikacak i dhunës është thellësisht shqetësues dhe është në kundërshtim me vetë parimet e paqes dhe bashkëpunimit. Zemra ime është për viktimat, familjet, miqtë dhe kolegët e tyre. Ky sulm i tmerrshëm thekson më tej domosdoshmërinë e diplomacisë dhe dialogut parandalues, nënvizuar gjatë javës së kaluar, kur mora pjesë në javën e nivelit të lartë të Asamblesë së Përgjithshme të OKB-së në Nju Jork. Në margjinat e nivelit të lartë, fola me drejtues dhe kolegë të shumtë nga e gjithë bota. Në një mënyrë apo tjetër, ne të gjithë theksuam rëndësinë e dialogut dhe bashkëpunimit”, ka shkruar Lajçak.
Ai ka bërë të ditur se për të gjetur rrugë përpara në dialogun me Kosovës dhe Serbisë, ka mbajtur diskutime me partnerët amerikanë.
“Për të gjetur një rrugë përpara në rajon dhe në veçanti në Dialog, mbajta diskutime strategjike me partnerët tanë amerikanë. Ishte e mrekullueshme të kthehesha në OKB, por pas një jave të “takimit të shpejtësisë globale” ishte koha për t’u kthyer në Bruksel. Në ditët në vijim, do të fokusohem plotësisht në gjetjen e një rruge përpara’”, ka shkruar tutje Lajçak./teve1.info/
