Në një deklarim pas këtij takimi të paparalajmëruar, emisari tha se ka biseduar me kryeministrin e vendit Albin Kurtin dhe me zëvendësin e tij, Besnik Bislimi, për lëvizjen e lirë, të pagjeturit e çështjet e energjisë.
“Jam në Prishtinë për të vazhduar diskutimet tona me kryeministrin Kurti për procesin e normalizimit të marrëdhënieve midis Kosovës dhe Serbisë dhe po ashtu kam takuar zëvendës-kryeministrin Bislimi rreth çështjeve aktuale në veçanti për çështjet lidhur me lëvizjes, të personave të zhdukur, energjisë. Ne duam të sigurohemi, jemi duke kërkuar zgjidhje për këto çështje që të evitojmë tensionet, eskalimet e situatës prandaj për këtë ne jemi pajtuar që të vijë dhe kemi pasur diskutime të frytshme dhe këto diskutime do të vazhdojnë”, tha Lajçak.
Kur u pyet për “kornizën e re të dialogut” që e përmendi Vuciq, Lajcak nuk tha se emisarët gjermanë e francezë, kanë bërë ndonjë propozim.
“Jam çuditur kur kam dëgjuar fjalën armaturë, jam duke u munduar që të kuptojnë çfarë do të thotë fjala armaturë”, tha ndërmjetësuesi i dialogut.
Ai tutje, tha se në këtë takim ndër të tjera ka diskuar me përfaqësuesit e Kosovës edhe për takimin e radhës në mes të liderëve, për të cilin nuk ka dhënë datë se kur do të mbahet.
“Ne jemi këtu që të lëvizim përpara, me procesin e normalizimit, takimi I ardhshëm do të mbahet kurdo që përgatitet mirë dhe kjo është një nga qëllimet pse jam këtu sot sepse ne duam të jemi të sigurt se takimi do të ketë përmbajtje dhe do të prodhojë diçka. E rëndësishme është që të dy liderët janë të gatshëm të takohen, BE-ja është gati që të presë ata por jemi duke e përgatitur agjendën. Nuk do të marrë kohë 13 muaj, ju siguroj”, deklaroi Lajçak para gazetarëve.
Edhe Qeveria e Kosovës me anë të një komunikate bëri të ditur se në takim u bisedua për vazhdimin e procesit të bisedimeve në Bruksel dhe për përgatitjet e takimeve të radhës në kuadër të dialogut.
Kronika e realizuar nga Valmir Gallopeni
