Pas një muaji, ndërmjetësuesi i Bashkimit Evropian për dialogun Kosovë-Serbi, Miroslav Lajcak, po e viziton Kosovën.
E pasditen e së martës Lajçak, fillimisht u prit në takim nga presidentja Vjosa Osmani.
Mediat u lejuan të marrin vetëm pamje para fillimit të takimit, derisa Lajçak u pa në disponim të mirë.
Deklarim pas takimit nuk pati, por se çka u diskutua shkroi presidenca në një njoftim.
“Gjatë takimit u diskutua mbi sfidat aktuale politike dhe të sigurisë me theks të veçantë në veriun e vendit, përpjekjet për deeskalimin e situatës, sikurse edhe nevojën për zbatimin e marrëveshjes së Brukselit dhe aneksit të Ohrit” – thuhet njoftimin e presidencës.
Osmani gjithashtu ka shtuar se grupet kriminale dhe individët që përdorën dhunë ndaj policisë, gazetarëve, pjesëtarëve të KFOR-it, EULEX-it dhe qytetarëve, duhet të përballen me drejtësinë.
Pas Osmanit, i dërguari i BE-së Lajçak shkoi në takim tek kryeministri Albin Kurti.
Takimi kësaj radhe zgjati më shumë se dy orë.
Me të përfunduar takimin, para medieve emisari i BE-së, tha se u pajtuan që të vazhdojnë diskutimet për shtensionimin e situatës në veri dhe se ka mirëkuptim për tri pikat e paraqitura të BE-së.
“Nuk është detyrë e lehtë, as situatë e lehtë. Kam pasur takime të rëndësishme me presidenten Osmani e kryeministrin Kurti. Diskutim të gjatë e sinqertë. Shumë të rëndësishëm. Duhet të zgjedh fjalët, ka mirëkuptim në nevojën për të ecur para në tri pikat që janë paraqitur nga BE-ja: shtensionim, zgjedhje të reja, dhe kthim në normalizim. Ende duhet të vazhdojmë diskutimet për hapat konkretë që duhet të merren. Ai ka prezantuar pikëpamjet e tij, unë të miat”, ka thënë ai.
Masat e BE-së, nuk e prekën edhe Serbinë, e Lajçak foli edhe për këtë cështje.
“BE-ja e ka bërë të qartë se ka sanksione të gatshme edhe për Serbinë, do të zbatohen nëse kuptohet se Serbia s’po vepron me kërkesat e BE-së. Është vendim i shteteve anëtare. Dëshira ime është të mos kemi sanksione ndaj Kosovës e Serbisë”, shtoi ai.
Lajçak të mërkurën do të udhëtoj në Beograd, për t’u takuar me presidentin serb Aleksandar Vuçiq.
