Emisari special për dialogun Kosovë – Serbi, Miroslav Lajcak gjatë se martës u prit në takim nga kryenegociatori kosovar, Besnik Bislimi. Diplomati sllovak kërkoi nga palët që bëjnë më shumë në zbatimin e marrëveshjeve, si dhe njoftoi se së shpejti do të zhvillohet një takim i ri në nivel të kryenegociatorëve.
Erdhi sërish në Prishtinë me gjysmë orë vonesë në takimin në kryeministri që ishte paraparë të niste në ora 09:30.
Ndërmjetësuesi special i BE-së për dialogun Kosovë – Serbi, Miroslav Lajçak këtë të marte u prit në takim nga zëvendëskryeminstri i Kosovës, Besnik Bislimi.
Diplomati sllovak dhe kryenegociatori i Kosovës në dialog me Serbinë, Bislimi zhvilluan takim me dyer te mbyllura që zgjati për mbi një orë.
Emisari i bllokut evropian kur doli para gazetarëve, nënvizoi rëndësinë që të dyja palët të bëjnë më shumë progres në zbatimin e marrëveshjeve.
“Kemi diskutuar një listë të gjatë të çështjeve. Dhe më e rëndësishmja është zbatimi i Marrëveshjes bazike të arritur dhe kjo është në interes të të gjithëve që të kemi progres në zbatimin e kësaj marrëveshjeje. Është marrëveshja më e mirë që kemi mundur të arrinim. Nëse do të kishte marrëveshje më të mirë, do ta kishim bërë prandaj është në interes të secilit që të zbatohet. Sepse në këtë marrëveshje kemi të gjitha përgjigjet, çfarë të bëjmë dhe si t’i bëjmë. Pyetja e vetme është se kur do të ndodhë zbatimi i këtyre pikave”, u shpreh Lajçak.
Në takim mes tjerash është folur edhe për rregulloren e BQK-së, e cila e bën euron valutë të vetme zyrtare në Kosovë.
“Një çështje tjetër që e kemi diskutuar e që është po ashtu e rëndësishme është rregullorja e fundit e BQK-së për pagesa në cash dhe arsyeja pse po e diskutojmë atë janë disa dispozita të caktuara në këtë diskutim që janë relevante për dialogun dhe është shumë e rëndësishme që e kemi diskutuar”, ka deklaruar Lajçak.
Bislimi nuk u prononcua për medie pas takimit me emisarin e BE-së, por përmes një komunikate njoftoi se çështja e dinarit nuk është pjesë e dialogut në Bruksel.
Poashtu, Bislimi e siguroi Lajçakun qё Qeveria ёshtё e interesuar tё sigurojë vazhdimёsinё e mbështetjes financiare tё Serbisë për serbët e Kosovës nё fushёn e edukimit, shёndetёsisё dhe mbrojtjes sociale.
Ai gjithashtu kërkoi që të zbatohen marrëveshjet përmes një plani të sekuencimit të drejtë, të barabartë e të balancuar mes palëve.
Krejt në fund, Miroslav Lajçak, njoftoi se janë duke planifikuar për një takim të ri në nivel te kryenegociatorëve në Bruksel.
