Nuk është koha e duhur për të hapur për qarkullimin urën kryesore mbi lumin Ibër, ka thënë emisari i posaçëm i Bashkimit Evropian për dialogun Kosovë – Serbi, Miroslav Lajçak.
Këto komente Lajçak i bëri sot në kuadër të Forumit të Delphit në Greqi, duke thënë se në vazhdimësi vitin e shkuar, Bashkimi Evropian është marrë me “menaxhim krizash”.
Sipas Lajçakut, vijat e kuqe duhet të respektohet nga të dyja palët.
“Përderisa flasim, në Mitrovicë ka kërkesë për ta hapur urën dhe atmosfera dukshëm s’është e duhura për këtë. Dua ta shfrytëzoj këtë panel që të dërgoj mesazh se kjo është platforma e duhur, ky plan është fitore e dyfishtë, ka shumë përfitime për të dyja palët dhe duhet të respektohen vijat e kuqe”, ka thënë Lajçaku duke iu referuar Marrëveshjes së Brukselit dhe Ohrit.
Ai ka thënë se zgjidhja e çështjes Kosovë – Serbi është ndër sfidat më strategjike, pasi ka thënë se shqiptarët dhe serbët jetojnë në tërë rajonin.
Ndërkohë, vendimi për hapjen e urës mbi Ibër ka acaruar Listën Serbe, ku këta të fundit kanë paralajmëruar se do të ketë incidente nëse një gjë e tillë ndodhë. /teve1.info/
