Në fazën që pritet të ketë zhvillime të reja të dialogur në mes Kosovës dhe Serbisë, i dërguari i Shteteve të Bashkuara të Amerikës, Gabriel Escobar, i dërguari i Bashkimit Evropian për dialogun, Miroslav Lajçak, këshilltarët për politikë të jashtme dhe siguri të Gjermanisë (Jens Plettnerin), të Francës (Emmanuel Bonnin) dhe të Italisë pritet të jenë të premten në Kosovë.
Zëdhënësi i BE-së për politikë të jashtme, Peter Stano përmes një konference për media e ka konfirmuar vizitën e këtij delegacioni në Kosovë dhe Serbi.
A ka njoftuar se Lajçaku në Prishtinë do të takohet me kryeministrin Albin Kurti dhe në Beograd me presidentin e Serbisë, Aleksandar Vuçiq, duke bërë të ditur se në këto takime do të diskutohen hapat e ardhshëm të normalizimit në mes të dy vendeve.
“Vizitat e përfaqësuesve tanë njoftohen nga institucionet e BE-së. Vërtetë emisari Lajçak do të udhëtojë këtë javë në rajon, që është në kuadër të tentimeve për ta avancuar dialogun e lehtësuar nga BE-ja. Lajçaku do ta vizitojë Kosovën e Serbinë këtë të premte. Në Prishtinë do të takohet me kryeministrin Albin Kurti e në Beograd me presidentin Aleksandar Vuçiq, ku do të diskutohen hapat e ardhshëm në normalizimin të marrëdhënieve mes Kosovës e Serbisë”, ka thënë Stano, shkruan teve1.info.
Ai tutje ka njoftuar se në këtë vizitë emisari Lajçak do të përcillet nga këshilltarët për politikë të jashtme të presidentit të Francës, kancelarit të Gjermanisë dhe kryeministrit të Italisë, si dhe nga zv. sekretari amerikan Gabriel Escobar.
