Të dielën, po udhëtonin në autostradën “Ibrahim Rugova”
Por, një aksident që ndodhi pikërisht në këtë vend, rezultoi fatal për një 69-vjeçare.
E moshuara ndërroi jetë pasi nuk arriti t’i mbijetonte plagëve të marra.
Ndërsa më lëndime të rënda, përfundoi burri i saj, i cili në ato momente po e drejtonte makinën.
E gjendja e këtij të fundit, një ditë pas aksidentit, është stabile.
“Pacienti pas ekzaminimeve laboratorike dhe radiologjike është dashur të nënshtrohet një intervenimi kirurgjik i cili është kryer në sallën e operacionit të Qendrës Emergjente edhe pas intervenimit kirurgjik është sjellë për trajtim të mëtutjeshëm mjekësor në Mjekimin intensiv Qendror. Pacienti e ka kaluar natën në MIQ, në gjendje stabile sa përket parametrave vital dhe sot është dërguar për trajtim të mëtutjeshëm mjekësor në Klinikën e Kirurgjisë Maksilofacial”, ka thënë Ukaj.
E deri te aksidenti, sipas Policisë së Kosovës, dyshohet se erdhi kur vozitësi e humbi kontrollin dhe u përplas me dheun që kishte rënë në autostradë.
Por, ky nuk është aksidenti i parë me fatalitet në këtë segment.
Në dhjetor të vitit 2025, dy gra të cilat ishin duke ardhur nga Shqipëria pësuan aksident tragjik në segmentin Suharekë- Prizen.
E ky aksident, duket se e vuri në lëvizje Ministrinë e Infrastrukturës dhe Transportit.
Këta të fundit pasditen e së hënës, njoftuan se është nënshkruar kontratat për sanimin e skarpateve në autoudhën “Ibrahim Rugova”
“Pas përfundimit të procedurave dhe shqyrtimit të ankesës nga Organi Shqyrtues i Prokurimit (OSHP), Ministria e Infrastrukturës dhe Transportit ka nënshkruar të premtën kontratat për realizimin e punimeve për sanimin e skarpateve në autoudhën R7 “Ibrahim Rugova”. Projekti përfshin ndërhyrje në tri lokacione të ndryshme përgjatë autoudhës:
Loti 1 – Sanimi i rrëshqitjes në km 72.4, me vlerë 2,087,952.94 €
Loti 2 – Sanimi i rrëshqitjeve në km 69.1 dhe 63.4, me vlerë 1,187,080.09 €
Loti 3 – Sanimi i rrëshqitjes në km 44.0, me vlerë 1,398,964.85 €
Vlera totale e projektit arrin në 4,673,997.88 euro”, thuhet në njoftimin e Ministrisë së Infrastrukturës.
Ndryshe, nga kjo Ministri kanë shtuar se procedurat për projektin përkatës kanë qenë në shqyrtim në OSHP dhe Ministria nuk ka asnjë mundësi ligjore të ndikojë në procesin e vendimmarrjes
