Basketbollisti amerikan, Kwame Vaughn është përforcimi më i ri i Proton Cable Prizreni.
Skuadra e Superligës së Kosovës në basketboll, të martën e ka zyrtarizuar amerikanin, i cili do të jetë pjesë e ekipit për pjesën e mbetur të këtij sezoni.
Në fakt, Vaughn rikthehet te Prizreni pas 3 vjetësh, ndërsa sezonin e shkuar luajti për skuadrën e Pejës.
“Liga e Kosovës nuk është e panjohur për të, prandaj eksperienca e tij, do të jetë padyshim avantazh i madh për ne si ekip”, ka shkruar ndër të tjera në njoftim Prizreni.
Fundori amerikan ka një karrierë të pasur si basketbollist në Evropë, pasi ka luajtur në disa prej ligave më të forta.
Sezonin e shkuar, 34-vjeçari pati 10 paraqitje për Pejën në Superligë dhe luajti me një mesatare prej 12 pikëve, 3 kërcimeve e 4 asistimeve për ndeshje.
Aktualisht, Proton Cable Prizreni është i parafundit në Superligë pasi ka tubuar 16 pikë pas 3 fitoreve e 10 humbjeve në 13 ndeshje në elitën e basketbollit kosovar.
