Kampioni i Kosovës në volejboll, Ferizaj do të udhëhiqet nga një trajner i huaj në sezonin 2026/27.
KV Ferizaj, të hënën ka njoftuar angazhimin e trajnerit nga Turqia, Ibrahim Emet, të cilin tashmë e ka prezantuar.
Në njoftimin e klubit, thuhet se KV Ferizaj po nis një kapitull të ri me trajnerin turk, i cili me përvojën, profesionalizimin dhe ambicien do të bëjë një ekip konkurrues për të arritur objektivat në sezonin e ri.
Klubi ka bërë të ditur se pas prezantimit të trajnerit, ditët në vijim do të vazhdojë edhe me prezantimin e lojtarëve që do të jetë pjesë e KV Ferizajt për sezonin 2026/27.
Gjithashtu, Ferizaj në sezonin e ri do të paraqitet edhe në Challenge Cup, ku në 1/32 e finales do të përballet me ekipin nga Çekia, Brno kurse ndeshjet do të luhen në muajin nëntor.
