Kuvendi me një nënkryetar, VV nuk i voton nënkryetarët e ish-opozitës
Deputetët u mblodhën sërish.
Mirëpo, përsëri rezultat nuk prodhuan.
Madje, në seancën e sotme të Kuvendit, ku pritej që më në fund të ndodhte konstituimi, votimi u bllokua tek çështja e nënkryetarëve të Kuvendit.
Për Lëvizjen Vetëvendosje, problem u bë propozimi i PDK-së, që Vlora Çitaku ta marrë këtë pozitë.
Me të filluar seanca, shefat e grupeve parlamentare u thirrën nga kryekuvendarja për konsultime.
Kërkesa e Vetëvendosjes ishte e njëjta, ndryshimi i emrave të propozuar nga PDK dhe LDK për nënkryetarë.
Por deputeti i PDK-së, Përparim Gruda tha se me këtë qasje Vetëvendosje e ka për qëllim moskonstituimin e organit legjislativ.
Edhe shefja e grupit parlamentar të LDK-së, Jehona Lushaku Sadriu tha se janë të gatshëm të votojnë cilën do formë.
Kësisoj, kryetarja e Kuvendit tha se do të votojnë për secilin propozim veç e veç.
Menjëherë filluan votimin për nënkryetarin e parë nga Vetëvendosje, Ardian Golën.
Gola mori përkrahjen edhe të opozitës, dhe me 101 vota u zgjodh nënkryetar.
Pas kësaj, radhën për votim e kishte e propozuara e PDK-së Vlora Çitaku.
Por këtu, dritat jeshile të votave u ndezën vetëm nga deputetët opozitarë.
Vetëvendosje vendosi të abstenoj.
Deputetët e PDK-së vendosën ta lëshojnë sallën.
Mirëpo, jo edhe Mërgim Lushtaku.
Mungesa e tyre, bëri që seanca të ndërpritet.
E kur seanca rinisi pas orës 14:00, PDK s’u paraqit sërish në sallë.
Pas situatës së krijuar, edhe LDK refuzoi të marrë pjesë në votimin për nënkryetarin e saj.
Kur u tentua të hidhej në votim, edhe deputetët e LDK-së lëshuan sallën.
Kështu vazhdimi i seancës u thirr për të dielën në ora 10:00.
