Kuvendi i Kosovës do të mblidhet nesër (e enjte) në orën 10:00, në një seancë plenare ku në rend dite janë paraparë dhjetë pika të rëndësishme.
Sipas njoftimit zyrtar, deputetët pritet të shqyrtojnë në lexim të dytë një sërë projektligjesh që prekin fusha të ndryshme, përfshirë ekonominë, shëndetësinë, financat dhe çështjet sociale.
Ndër pikat kryesore të rendit të ditës janë Projektligji për Masat e Përkohshme të Produkteve Themelore në raste të destabilizimit të tregut, ai për Sigurimin e Detyrueshëm të Kujdesit Shëndetësor, si dhe Projektligji për ndryshimin dhe plotësimin e Ligjit për Kontabilitet, Raportim Financiar dhe Auditim.
Po ashtu, në shqyrtim do të jenë edhe projektligjet për Shërbimet e Pagesave, për organizimin e Lojërave Mesdhetare Prishtina 2030, për Financimin e Menaxhimit të Resurseve Ujore, si dhe ai për Banim Social dhe të Përballueshëm.
Seanca do të trajtojë gjithashtu Projektligjin për Shtetësinë e Kosovës, atë për Lëndët Plasëse, si dhe Projektligjin për Provimin e Maturës Shtetërore.
