Edhe propozimi i tretë për kryeparlamentar nga Lëvizja Vetëvendosje hasi në kundërshti nga partitë e ish-opozitës.
Kësaj radhe partia më e madhe në vend propozoi ministrin në detyrë të Financave, Hekuran Murati për këtë post, por që i siguroi vetëm 57 vota.
Kreu i PDK-së, Memli Krasniqi, e përsëriti qëndrimin e partisë se nuk votojnë për askënd nga Vetëvendosje që ka ushtruar pozitën e ministrit.
“Janë edhe 35 kandidatë të tjerë që i ka LVV që po të viheshin në votim, ndoshta sot do ta kishim të zgjedhur edhe kryetarin edhe konstituimin”, tha Memli Krasniqi.
Por sipas ministres në detyrë të Punëve të Jashtme, Donika Gërvalla, bllokimi në Kuvend nuk lidhet me emra të përveçëm.
“Frika e opozitës nga Qeveria Kurti 3 është shpërfaqur hapur muajve të fundit dhe s’ka asnjë arsyetim që mund ta bindë cilindo qytetar të republikës që qenka çështja për emra të përveçëm”, tha Gërvalla.
Ndërsa, Fatmir Limaj dhe Ramush Haradinaj po kërkojnë nga Vetëvendosje që ta bëjnë të ditur më herët emrin e kandidatit për kryeparlamentar.
“Kemi shumë emra të tjerë në Vetëvendosje që do t’i votonim”, tha Haradinaj.
“Situata nuk është normale. Nuk duhet të befasohet me emrin e kryetarit të Kuvendit, duhet të dihet paraprakisht, t’i ketë 61 vota, të shkohet të votohet, ka vendimmarrje politike”, deklaroi Limaj.
Kurse, nënkryetari i LDK-së, Lutfi Haziri, tha se pa një marrëveshje politike nuk zgjidhet ky ngërç politik.
“Nuk e zgjidhë asnjëherë situatën nëse nuk ka marrëveshje politike…Pozicioni ynë është i tillë. Ne kemi thënë ‘faleminderit, nuk jemi të gatshëm të hyjmë në një mandat qeverisës me partinë e parë’, për shkak të të gjitha arsyeve që i kemi dhënë”, tha Haziri.
Seanca e radhës për konstituimin e Kuvendit do të mbahet më 24 gusht në ora 11:00.
