Kuvendi i Kosovës është mbledhur sot për të 41-n herë radhazi në përpjekje për t’u konstituuar, proces ky që vazhdon të mbetet i bllokuar në fazën e zgjedhjes së Kryetarit të Kuvendit.
Lëvizja Vetëvendosje (LVV) vazhdon të insistojë në kandidaturën e Albulena Haxhiut për postin e kryetares së Kuvendit, ndonëse partitë opozitare kanë deklaruar se nuk do ta mbështesin atë. Sipas tyre, Haxhiu nuk është një emër unifikues dhe nuk gëzon konsensus të gjerë parlamentar.
Përkundër thirrjeve për zgjidhje, palët politike nuk kanë arritur marrëveshje, duke mbajtur të bllokuar konstituimin e Kuvendit dhe zvarritur formimin e institucioneve të reja.
Ndërkohë, Gjykata Kushtetuese e Kosovës ka vendosur që deputetët janë të obliguar që brenda 30 ditësh nga hyrja në fuqi e aktgjykimit, të përfundojnë seancën konstituive përmes zgjedhjes së Kryetarit dhe Nënkryetarëve të Kuvendit.
Afati kushtetues tashmë po afron, ndërsa paqartësitë politike dhe mungesa e vullnetit për kompromis mund të thellojnë edhe më tej krizën institucionale në vend.
