Më 8 korrik u certifikuan rezultatet e zgjedhjeve të 7 qershorit.
Ani pse aktgjykimi i Kushtetueses përcaktonte se brenda 30 ditësh duhet konstituuar Kuvendi, kjo nuk ndodhi.
E tek pas 60 ditësh, të mërkurën e 9 shtatorit, kryeparlamentare u zgjodh Albulena Haxhiu.
Mirëpo pa zgjedhjen e nënkryetarëve, Kuvendi ende nuk vlerësohet i konstituuar.
Vonesat në konstituim konsiderohet se nuk kanë nevojë për interpretim nga Kushtetuesja.
Kjo pasi sipas avokatit Hasan Shala, ky institucion tashmë ka qartësuar se është shkelje.
“Edhe nëse çohet rasti në Gjykatë Kushtetuese unë besoj se ajo nuk do të japë përgjigje për shkak se kjo çështje është e gjykuar dhe nuk ka se çka me interpretu aty përveç se me përcaktu atë vendim që e ka nxjerrë ma përpara”, u shpreh avokati, Hasan Shala.
Edhe juristi, Alban Arifi thekson se në aktgjykimet e saj, Gjykata ka qenë e qartë.
“Kushtetuta e Republikës së Kosovës e parasheh qartë afatet të cilat duhet të respektohen në rastin e konstituimit të Kuvendit, atëherë unë besoj dhe jam i bindur se edhe deputetët të cilët janë në parlamentin e Republikës së Kosovës të cilët e kanë të kajrtë lidhur me afatet dhe procedurat sa i përket konstituimit të Kuvendit”, tha avokati tjetër, Alban Arifi.
Por që sipas tij, në aktgjykimet e Kushtetueses ka disa paqartësi.
“Sa i përket pasojave të cilat nuk parasheh Gjykata Kushtetuese lidhur me aktgjykimet se çka ndodhë pas afatit 30-ditor, edhe pse është dashur që dje Kuvendi i Kosovës të ishte i konstituuar. Prandaj në mungesë të pasojave, mospërgjegjësisë së deputetëve të zgjedhur në Parlamentin e Kosovës, jemi në situatën të cilën gjendemi tani pa konstituim të Kuvendit”, deklaroj tutje avokati, Alban Arifi.
Gjatë ditës, nga Kushtetuesja kanë thënë për tëvë1 se deri më tani nuk kanë pranuar ndonjë kërkesë për ta interpretuar respektimin apo jo të afateve.
